21.8.12

Kuwait from top

وصلنا الكويت .. وهذي صوره لدولة الكويت الحبيبه من الاعلى .. وشكرا شكرا

 

Qatar from top

صور التقطتها من نافذه الطائره لجزء من دولة قطر الشقيقه




وهذه وجبة الغداء من الخطوط الجويه القطريه عباره عن ساندويش دجاج و عصير برتقال .. وشكرا شكرا 

نبذه مختصره مفيده حق اللي يبي يروح قطر

وايد حطيت صو بس ماتكلمت .. خليت الكلام بالاخير .. قطر دوله تشبه البحرين الى حد ما .. بشوارعها و طريقتها و مبانيها .. بس مافيها زحمه نفس البحرين مع ان الوقت كان عيد و المفروض يكون زحمه بالمجمعات .. هذا من حسن حظنا طبعا .. جوها حار بس ابرد من الكويت وايد يعني عادي نطلع و نتمشى بعز الظهر ماكو قته نفس الكويت .. بس الرطوبه اللي عندهم خايسه .. و على حظنا حاشتنا اول يومين الرطوبه .. الوضع كان مأساوي و خنقه و لي طلعنا جنا متسبحين .. مانصحكم كلش تزورونها وقت الرطوبه .. شعبها محترم جدا

الفندق اللي سكناه كان كمبنسكي سويتس .. خذينا سويت جميل جدا مكون من غرفتين ماستر و صاله و مطبخ و حمام .. الفندق وايد نظيف و حلو .. بعض الصور موجوده في بوست سابق

الاماكن الخاصه بالتسوق قليله مقارنة بالكويت راح احطها بالترتيب من الافخم و الاكبر .. عندهم المجمع المشهور اللي احترق اسمه فيلاجيو .. الله يرحم اللي توفوا بهالحادث المأساوي و يكون بعون اهلهم .. المجمع من صارت الحريجه واهو مسكر .. شكله حلو وايد بس دام مو متوفره فيه شروط الامن والسلامه مانبيه عوع .. يولي

المجمع الثاني العود اهو السيني سنتر .. ممتاز و فيه محلات وايد

يليه مجمع لاند مارك .. جميل و ملموم نوعا ما

يليه مجمع اسمه حياة بلازا .. و عقبهم مجمع اسمه رويال بلازا

السوق القديم و المشهور نفس طقه المباركيه بس زقرت اسمه سوق واجف .. كله خماجير و فناتق .. و خوش مطاعم و قهاوي قعدتهم حلوه وايد جنه باوربا بس لازم تختارون يوم مناسب مو بالرطوبه علشان ماتكرهونه .. الحلو بسوق واجف .. الخبز رقاق اللي يسوونه الحريم عند المدخل مال السوق .. حده روعه و يذكرني بايام الطفوله و يوم البحار .. بالجبن .. بالزعتر .. بالجبن والزعتر .. بالبيض .. بالبيض و الجبن .. حبيته وايد

المطاعم الاسف ماقدر افيدكم وايد لان مارحنا مطاعم وايده .. غير وافي غورميه اللبناني .. و مطعم امريكي تخصصه بحري .. و اسمه ريد لوبستر .. انصحكم فيه لمحبي الاكل البحري .. كاتبه عن هالمطعم في بوست سابق

الكافيه المميز عندهم كتبت عنه في بوست سابق .. و هو كوفي بينري

الديره عنونه .. اجروا سياره و ركبوا قارمن ولا اي شي و قزو فيها .. ماتحتاجون تكاسي و لويه

وشكرا شكرا
 المقاهي في سوق واجف

الخبز رقاق بالجبن و الزعتر في سوق واجف

سيتي سنتر

حياة بلازا

رويال بلازا

لاند مارك

فيلاجيو

Wafi Gourmet - Qatar

وجبة اليوم كانت بعد المغرب (غداء + عشاء) .. من مطعم وافي غورميه اللبناني .. خذيت طبق سلطه مكون سلطه (اربع انواع اختارها حسب ذوقي) .. و طبق شيش طاووق متبل بالروب .. ماعون السلطه كان لذيذ و يشبع بروحه الشيش طاووق ماله داعي بس هم حلو ترا .. احلى شي بالسلطه الحمص و الورق عنب بالزيت .. الحمص كان حويمض شحلوه .. والورق عنب اصلي لبناني .. وشكرا شكرا


20.8.12

Nestle Toll House - Qatar

اغراني لون الكوب جان اشتريه حق الاسبريسو و الحركات مالت مكينه النسبريسو والاشياء .. وهالعلبه الحديديه الجميله بعد .. متعدده الاستخدامات .. حبيتهم




Macchiato at Coffee Beanery - Qatar

مكياتو .. سترونغ كوفي .. لذيذ .. و شكرا شكرا

Coffee Beanery - Doha City Center

هذا الكافيه امريكي .. عندهم خوش قهوه .. لذيذه وايد .. اللي اهي بالكاراميل .. الكافيه متوفر بالمطار و باغلب المجمعات التجاريه .. مافي بالكويت لي الحين مو مفكرين يفتحون فرع بالكويت .. احتمال بالمستقبل الله اعلم .. المهم انها لذيذه .. و شكرا شكرا

Hallmark - Qatar

من الاشياء اللي ما اقاومها الاكواب .. اشكالها والرسمات و التعليقات اللي عليها مغريه .. شريت هالمق الجميل .. و جنطه صغيره لحفظ الطعام .. و ستيكرز .. وشكرا شكرا

19.8.12

الاحتفال بعيد الفطر السعيد 2 - قطر

وهذا الفيديو الجميل ايضا لاحتفالات عيد الفطر السعيد 2012 في دوله قطر الشقيقه بعد ماطلعنا من مجمع حياة بلازا رحنا رويال حياة ولقيت مجموعه اخرى من الشباب تقوم بغناء نوع اخر من الاغاني التراثيه الجميله .. وشكرا شكرا


Youtube link

Lovely mugs from Tavola (Royal Plaza) - Qatar

مناسب حقي ولايق على شخصيتي خذيت اخر مق .. مع كوب الكورن فلكس الحبيب .. بالصوره طالع صغير وعادي بس اهو كبير و جميل .. وشكرا شكرا


Lunch + Dinner at Red Lobster - Qatar

من امس مشتهيه اكل بحري .. بالصدفه واحنا رايحين المجمع لجحته رفيجتي .. مايبيله .. اكيد فوق تحت و نقطه نظام لول .. طلبت ربيان مخبوز عالخشب بصلصه الزبده مع عيش .. و بطاطس مخبوزه .. المطعم مبطل بقطر من شهرين يقول و اللي بالكويت راح يفتح بنهايه اغسطس او سبتمبر ان شاء الله

وشكرا شكرا



الاحتفال بعيد الفطر 2012 - قطر

الاحتفال بعيد الفطر السعيد بالمجمعات القطريه جميل جدا .. اللي حبيته وجود مجموعه من الشباب يفترون بالمجمع و يغنون اغاني تراثيه جميله .. هذا الفيديو القصير صورته داخل مجمع تجاري اسمه حياة بلازا باول يوم العيد .. وشكرا شكرا


Youtube link

كل عام وانتم بخير - عيد الفطر ٢٠١٢

الصوره مو تصميمي ترا .. بس وايد عجبتني

Books from Jarir Bookstore - Qatar

هالكتب شريتها من مكتبه جرير في دوله قطر .. لازم كل ديره نشتري منها كتب و ذكريات .. وشكرا شكرا

17.8.12

Kempinski Residences & Suites - Doha

وصلنا الفندق .. شكله تحت جدا جميل و السويت وايد حلو .. يبيله بعد احد معانا لانه كبير علينا .. السويت عباره عن غرفتين ماستر وحده سرير مزدوج و الثانيه سريرين منفصلين .. و صاله و حمام و مطبخ مجهز بالكامل .. الديكور جدا جميل .. بسيط و راقي .. و شكرا شكرا

المدخل عند الرسبشن

اللوبي

 المطبخ مجهز بالكامل

مجسم نحاسي جميل

مياه ايفيان ظيافه من الفندق

الغرفه الرئيسيه

الصاله

طاوله الاكل بالصاله