31.12.11

باقي اخر خطوه و نوصل امستردام .. التاكسي


الساعه الحين 8.45 مساءً .. ركبنا تاكسي اخيرا بعد مشاورات طويله ينفقون منو يروح و منو معاه .. لان احنا كلنا ١٤ شخص .. اثنين مادري وين يبون و الباجي كلهم امستردام .. المهم .. ركبنا و بغط شوي على مانوصل لان هذي حوستنا من خمس الفير لي الحين .. راح اليوم كله بدون استفاده

وشكرا شكرا


Sent from NooN's iPhone✌

شنو صار لما راح عنا القطار؟

ميم تبجي و معصبه وانا مادري شسوي .. حاولت اهديها وافهمها ان لازم نروح الانفورميشن لان في معانا ناس و قالوا راح يودونا امستردام .. بس ميم مافهمتني الا لما شافت شله نفس حالتنا .. اهني ارتاحت شوي .. كنا كلنا سبع اشخاص .. انا واهي .. و ثلاثه من المانيا ربع .. و واحد ومرته من البرازيل .. حبيت البرازيليين وايد .. حليوين .. المهم اللي صار .. قالولنا تصعدون القطار لي مادري وين .. تالي تروحون بتاكسي لي امستردام .. هني كيفت ميم و الظحكه ترست الويه .. الحمد لله .. عاد انا الحين قاعده اكتب من القطار والساعه الحين 7.26 مساءً .. إن شاء الله نوصل امستردام حسب كلامهم عالعشر ونص مساءا و نلحق على راس السنه هناك :)

 احتاج قهوه بهاللحظه


وشكرا شكرا

Sent from NooN's iPhone✌

تاخر القطار سبب ازمه

تاخر القطار عشر دقايق .. استلمت جنطتي منهم .. و صعدنا القطار .. المفروض انه اول مايوصل وجهته نركض خلال ست دقايق علشان نقدر نلحق على اخر قطار حق امستردام اللي المفروض يمشي 6.26 مساءً .. بس للاسف القطار اللي يروح امستردام مشى قبل ما يوصل قطارنا لانه تاخر .. تكفون منو فيكم حاط عينه عالسفره وخربها؟؟

اخ ياقلبي .. حجز الفندق راح بهاليوم طبعا .. ٢٥٠ يورو .. ما يقارب ال ٩٤ دينار .. راحت بالهوى غير حجوزات القطارات اللي ماصعدناها .. الله كريم

كل عام وانتوا بخير و ان شاء الله تكون سنه خير عليكم


كتبت هالبوست الساعه 6.35 مساءً .. بالقطار المتاخر :(

وشكرا شكرا

Sent from NooN's iPhone✌

ثاني يوم بالسفره - من فيزبادن الى امستردام .. بدت المغامرات


اخ ياقلبي .. بغيت اغسل صحون .. وبغيت اطر علشان احصل فلوس مكالمه وادق على اهلي :( .. تدرون ليش؟؟ شوفوا الله يسلمكم اللي صار اني نزلت من القطار و شلت جنطتي العوده .. نزلنا انا و ميم تحت بنروح اللونج نشبك و نشرب كوفي (وايد متفائلين) .. المهم .. استوعبت اني ناسيه جنطتي الكروس بالقطار .. و اللي فيها جوازي و فلوسي .. لا اراديا خليت جنطتي العوده عند رفيجتي و قلت لها نسيت جنطتي و رحت ركض فوق بشوف مشى القطار ولا بعد .. ياويلي .. طلع القطار ماشي .. نزلت ولا رفيجتي مو تحت .. يمه @@ .. حاولت ادورها ماحصلتها .. اثاري اهي تدورني بعد .. و صرنا مثل توم و جيري محنا محصلين بعض .. يا اهي فوق وانا تحت ولا العكس .. المهم .. بجيت .. و اول ماطرا على بالي اني شلون برد الديره بدون جواز!! .. وين اروح؟؟ انزين احنا من اي محطه يينا علشان ابلغ المفقودات عن الجنطه؟؟ ماكو اجابه .. قمت اصارخ بالمحطه .. مييييييم .. مييييم .. يمكن تسمعني لول .. رحت المفقودات قلت ابلغ عن جنطتي تالي ارد ادور ميم .. قالولي المفقودان مانعرف من اي قطار انتي لي عرفتي من وين ياي تعالي .. رحت عند الانفورميشن .. و اترجاهم ينادون رفيجتي مو راضين .. تالي بجيت و كسرت خاطرهم قالولي ناديها انتي هههههه جان اناديها (ميم اذا تسمعيني تعالي الانفورميشن انا هناك) لول .. بس والله الالمان عسرين طلع اغلبهم ما يحبون المتحجبات مع اني مبتسمه و مسالمه .. مالت عليهم .. المهم .. عقب ماناديتها شوي ولا اشوفها جبالي يايتني .. طبعا جنه احد كات علي ماي بارد .. ردت روحي .. قمنا نتحلطم على بعض ههههه .. طلعت مبلغه عن الجنطه و قالولها روحي استلميها من محطه Dortmund Hbf .. رحنا نحجز حجز ثاني بدال اللي راح حق المحطه و حق امستردام مره اخرى .. على حسابي بما انها غلطتي .. وصلنا هناك عقب ساعه ونص يعني 1.15 الظهر تقريبا.. يابوووووووي .. راح علينا الاحتفال مال امستردام .. رحنا عند المفقودات .. ونتفاجا ان ماعندهم شي .. لا لا لا مووووووصج .. ولا يدرون عن الجنطه حتى .. و قالوا ماكو حل الا تروحون هامبرغ لانها اخر محطه للقطار اللي نسيت فيه جنطتي .. حاولنا مني مناك راويناهم التذاكر لان مانبي كل شوي نروح ونرد عالطل و نحجز كل شوي .. عاد حاولوا يساعدونا و قالولنا نطروا لي الخمس و نص بيي القطار اخذو الجنطه و صعدوه بنفس تذكرتكم القديمه لانها مانلغت بما انها فيرست كلاس .. تالي بدلوا بمحطه دسبورغ .. يا الهي .. ومتى نوصل امستردام؟؟ قالوا ثمان و ثلث بالليل @@ .. وشنسوي .. راح يومنا .. كله منج يا جنطتي .. لو مو الجواز و الفلوس جان طاف و ماتشحططت معاج :(

 عاد انا كله البس جنطه كروس و مو من عادتي افصخها حتى بالسياره .. بس الله كاتب ان كل هذا يصير .. و مادري بنلحق على شي نشوفه ولا لأ

و شكرا شكرا

 
ملاحظه: كل اللي كتبته عايم على بعضه لاني بالمحطات اكتبه وانا انطر .. علشان بعدين سيده اسوي بوست .. الساعه خمس و ربع الحين .. الله يسهل امورنا يارب و ما الاقي شي مفقود .. وترا خيره ان حجزنا بالاولى لو العاديه جان مالي امل احصلها .. الحمد لله

Sent from NooN's iPhone✌

الريوق العجيب مال كراون بلازا - Wiesbaden



بالبوست اللي طاف تكلمت عن الريوق بشكل سريع .. و خصيت الصمون و الكرواسون و المربى الطبيعي .. لانه الصراحه كان احلى ما في البوفيه .. الصمون يابس و من داخل ليييييين و مايقث .. الكرواسونه حنونه و ترفه و خفيفه حدها .. المربى كان صناعتهم و حده روعه .. الباجي كالمعتاد


وشكرا شكرا

Sent from NooN's iPhone✌

30.12.11

اول يوم بالسفره - Wiesbaden

 وصلنا فرانكفورت .. و اتجهنا بالقطار الى فندق كراون بلازا في منطقه وزبادن .. كانت خوش منطقه .. هاديه و حلوه بس كان في شي ناقصنا .. النت .. فقعدنا ندور شركه نشتري منها خط تعبئه .. بس واجهتنا مشكله صغيره .. الا وهي .. ان ماحصلنا شي سعره معقول او بالاصح يسوى حق ثلاث ايام .. ارخص شي و افضلهم حسب المقارنه بين الشركات كانت شركه او تو (O2) سعره ٢٥ يورو لمده شهر .. و اللمت ٣٠٠ ميقا .. باجي الشركات يا بوطقه و بطئ .. ولا غالي و اللمت اقل .. المهم ان خذيناه و كنا مستانسين علبو بنشغل الايفون خلاص .. بس يافرحه ماتمت ..ليش؟؟ .. لان كانت خطتنا ان بنقعد يوم بالمانيا تالي بنروح امستردام و نطق فره صغيره عاللي نقدر عليه و بعدين نرد اخر يومين المانيا .. طبعا امستردام الاساس فيهم و اللي كنا مخططين نبيها براس السنه فكان لازم نمشي مبجر من المانيا علشان يمدي نشتري خط من امستردام قبل لاتسكر المحلات و تصير عطله راس السنه و نفلس من الخط .. المهم .. نرجع حق محور حديثنا .. قعدنا الساعه 5 فجراً و تريقنا خوش ريوق بوفيه الفندق .. الصمون والكرواسون .. و المربى الطبيعي موووصج .. تالي مشينا بنروح امستردام .. الحزه صبح بس جنه ليل ماكو شمس .. ياحظهم ههههه .. للاسف ام الخط اللي خذيناه لي الحين ماشتغل فماقدرت اوثق السفره اول باول :(

غيرنا القطار لي واحد سريع و حلو .. و المفروض اكون شابكه باللونج بما ان حجز القطار عالدرجه الاولى .. فالنت والمشروبات ابلاش هناك .. بس للاسف صارت لي سالفه عويصه اللي حتى خط من امستردام ماراح احصله .. البوست اقول لكم شنو صار .. و شكرا شكرا

ملاحظه: اللي بيحجز قطار خل يروح درجه اولى لسببين .. الاول ارخص .. و الثاني اريح و هدوء

اي صج .. نسيت لا اتكلم عن الرحله بالطياره من الكويت لي فرانكفورت .. لاول مره اشوف الطياره فااااااضيه .. ننبطح على كيفنا و ماكو حر وقته كالعاده و لا يهال و غثى و ازعاج .. حبيت الوضع وايد لدرجه ان وصلنا و ماتمللنا نفس باجي السفرات المتعبه


Sent from NooN's iPhone✌

29.12.11

عطله راس السنه ٢٠١٢

شكلي تعودت عالسفرات القصيره و المتنوعه .. راح تقلع الطياره .. ترقبوا التفاصيل .. و شكرا شكرا


Sent from NooN's iPhone✌

26.12.11

Berry Boutique - fresh juice & frozen yogurt

اكتشفته عن طريق التويتر .. قالولي عندنا خوش فروزن تعالي جربيه .. هالكلام من زمان لما كنت بالبحرين وقتها كان افتتاح المحل اعتقد .. وكنت حاطته ابالي بجربه لي رجعت الكويت .. عاد بما انه قريب على مقر عملي .. قلت خل اجربه وانا طالعه يبرد علي .. وبدت رحله الادمان .. ياربي .. اتعب وانا اقول حلو وخفيف عالقلب .. مذاق لا يوصف .. خفيييف .. ومافيه لسعه الروب الحامضه .. يعني حق اللي مايحبها راح يستانس عليه .. من كثر ما حبيته .. قمت احس بان بنك بيري ثقيل على قلبي ويقثني .. تقريبا هجرته من اول ماذقت هالنكهه الخفيفه و اللذيذه

على فكره اهم مو بس فروزن يوقرت .. عندهم شغلات حلوه عصاير واشياء ثانيه .. و في شغلات حق اللي مسوين رجيم ومارجيم .. بس انا ادمنت عاليوقرت الخفيف واللطيف .. جربوه وعطوني رايكم .. اهو مكس .. بدون شي فوقه لان ماحب الفواكه وايد هيهيهيهيهيه

وانا قاعده اكتب اشتهيته .. مع اني مساع ماكله واحد

اللي حاب يجربه .. مكانهم بشارع البحرين .. يم بيتزا بابا جونز ..مو الشارع اللي فيه ستاربكس مجمع شيخه .. اللي جباله
وهذا رقمهم .. في توصيل للاماكن القريبه فقط .. 25730866
وهذا اكاونتهم بالتويتر .. @Berry_Boutique

وشكرا شكرا

4.10.11

فحص العين في المنازل - VIP

كنت طالبه عدسات من نظارات كيفان .. توصيل منازل .. ويابولي هالاعلان معاهم .. حبيت الحركه حق الكساله مثلي و اللي يتمللون من النطره .. و حق الكبار بالسن.

وشكرا شكرا




Sent from NooN's iPhone

19.8.11

Alpets.com .. موقع لعشاق الحيوانات

هالموقع كان اسمه سابقا

q8pets.net
طبعا كل محبي الحيوانات يعرفونه لانه غني عن التعريف .. و اللي ما مر عليه الموقع .. باختصار فكره الموقع كانت عباره عن عرض الحيوانات للبيع .. "وايد بعت فيه" .. بس حاليا تطورت الفكره وصارت اشمل .. شلون؟؟ .. الله يسلمكم صارت مكان اجتماعي لمحبي الحيوانات مثلي وشرواي احم احم .. الموقع صار يحتوي على عدة اقسام .. الا وهي؟


قسم خاص بعرض حيواناتكم الحبيبه بطريقه مرتبه وحلوه .. كل واحد من الحيوانات نقدر نكتب بياناته و نعرض صوره على حدى


وقسم خاص بالبيع .. لعرض الحيوانات اللي بتبيعونها فقط


وقسم خاص بالبحث عن حيوان معين او فصيلة معينه انتو تبونها


وقسم الحيوانات المفقوده (هالمكان يعور القلب الصراحه) ان شاء الله ما استخدمه

واخر قسم فيه المحلات اللي نقدر نشتري منها كل شي يخص الحيوانات مثل الاكل والالعاب و البيوت وغيرها من الاشياء المهمه للحيوانات

الموقع لي الحين تحت التجربه .. بس حبيته .. وايد حلوه فكرته وقويه .. عالاقل لو ابي اشتري شي اعرف صاحب الحلال شلون يعامل حيواناته .. مهتم فيهم ولا لأ .. وهم نشوف صور الام والابو و هالسوالف .. كل شي بالبروفايل يبين


كل الشكر حق صاحب الفكره و المنفذ وكل من شارك بهالمشروع الحلو .. يعطيكم الف عافيه

ملاحظه: كلمه حيوانات بقاموسي تشمل كل شي .. يعني طيور وحيوانات و زواحف و سمج (الانواع اللي نقدر نحطها بالموقع) .. وشكرا شكرا



alpets link
شرح استخدام الموقع link

11.7.11

لحظه استرخاء

link

GEX Magical Water

Freshwater & Marine Reef fish all in one tank @@

for more info. you can check MonsterFishKeepers

Aquarium fish in Okinawa - Japan


link


عجبني الحوض وانا احوس باليوتيوب لقيته .. اينن .. حده روعه .. نظافة الحوض و صفاء الماي .. على السمج الموجود .. كميات السمج و انواعه .. شي عجيب .. تناسق الكميات وايد حلو واضح انه مدروس مو بشكل عشوائي .. ياخلاف علينا

10.7.11

Sweet'N Cup

وايد اشوف الصور مالت المولتن و الكب كيك من سويت ان كب .. بس ولا مره ذقته .. شكله كان يشوق .. و اليوم ذقته مع صديقتي وحبيبتي ميم .. الصراحه شي مو طبيعي .. اللي يحب الككاو راح يستمتع فيه نفس ما استمعتنا .. ولا بعد تحسفنا ليش خلص بسرعه هيهيههيهي .. يمه يمه يمه صج عوار قلب
موقعهم بجمعيه اليرموك .. او بسايت طلبات
وشكرا شكرا

7.7.11

حملة المدونين ضد الانترنت المحدود في دولة الكويت

قررنا انا و الاخوه والأخوات المدونين الكويتيين القيام بحملة ضد الانترنت المحدود , وبما انه زمن الثورات قررنا القيام بثورة انترنتية ضد الانترنت المحدود تحت حجة “الاستخدام العادل ” فنحن المدونين نرفض رفضا تاما القيام بمثل هذه الممارسات اللتي تسلب من المشترك او المستخدم حرية استخدام للانترنت بالشكل المتعارف عليه في كل دول العالم , نحن ندفع في الكويت اسعار خيالية من اجل توفير خدمة انترنت ذات استخدام عادل بكل ماتحمله الكلمة من معنى , فالأستخدام العادل معناه ان يكون الانترنت غير محدود وغيرد مقيد بحجم ما , ولايجب ان افوت الفرصه للحديث عن ارتفاع اسعار الانترنت في دولة الكويت , فالاسعار هنا فعلا خيالية ومبالغ فيها , والمقابل خدمة محدوده جدا وغير عادلة للاسف نحن في زمن الانترنت وفي عام ٢٠١١ لايكاد يوجد شخص في الكويت الا ويستخدم الانترنت , وقد دخل الانترنت في جميع الاشياء سواء الهواتف النقالة والكمبيوترات وحتى الاتصالات اليومية والمراسلات بين الاشخاص , فمن هنا نعلن نحن المدونين الكويتيين عن رفضنا القطعي والتام لما يسمى بالانترنت المحدود

لذلك …

نطالب كل من يملك القرار بالتدخل بأسرع وقت ممكن لوقف هذي المهزلة ، وبناء على كلام النائب الفاضل أحمد السعدون الذي أقر بأن شركات الإنترنت ( غير مرخصة ) فنطلبه و بقية الشرفاء بالإسراع في وقف هذا العبث

هذا مجرد موضوع للتذكير !! وإن لم تتوقف الشركات عن سياساتها واسعارها المبالغ بها ، فسنقوم بكشف كل الأوراق ومن له حق القضاء سينصفه بدون شك

المدونات المشاركة في الحملة :

1- مدونة زهقان

2- Made in q8`s Blog

3- مدونة فيصل

4- صور وفيديو من الكويت

5- مدونة كيفان 5

6- مدونة منوعات

7- مدونة سو

8- بو جسوم

9- مدونة زقرتي

10- مدونة بو وضحى

11- مدونة هبات كويتية

12- مدونة غازي

13- q8y4ever

14- جبلة

15- مدونة بوفوزي

16- مدونة الجلاوي

17- q80mar

18- فرانكوم

19- Q8Ping

20- I’m Geek

21- مدونة أبوفلان

22- Kuwait Anti Bandwidth Cap Alliance<<< من أوائل المبادرين بارك الله فيهم

23- Q8LoL

24- Bluekads Blog

25- chocolate and chocolate

26- HiKuwait

27- TKANA

28- Blog Laish

29- الشبكة الوطنية الكويتية ( منتدى ) شكرا لكم تثبيت الموضوع

30- إلكتروني

31- Kuwait 10 World

32- Saleh’s Blog

33- pinkgirlq8

34- 18seven

35- q8simple

36- مدونة قحفية

37- sh5abe6

38- 3zezy

39- manoola82

40- مدونة شخصية فتاكة

41- WHY NOT

42- Alblogy

43- المباركية

44- أنت يا

45- HOW2Q8

46- mabee2

47- Q8 Lens

48- كويت بور

49- سوق ومزاد بيعة ( منتدى )

50- صور بلاك بيري

51- طلبة الكويت ( منتدى )

52- iMohmd

53- كويت i فون ( منتدى )

54- الكويت بيت الزين

55- ناعمة الهمس

56- Q8Ryuk

57- 4rockNrollers

58- إنعكاس الفكر

59- Q8 Rain

60- krazysweetONE

61- مدونة إستح

62- ALMOST BLOG

63- بودكاستي

64- meenakon

65- كاظمة ( صحيفة )

66- شخبوطة كويتية

67- Crowsy

68- NooN

69-

70-

71-

72-

73-

74-

75-

76-

77-

78-

79-

* الاخوة المدونين الراغبين بالاشتراك بالحملة , ماعليهم سوا نسخ الموضوع مع اضافة رأيهم الشخصي ووضعه كتدوينة في مدوناتهم و مراسلتنا

لا تقل مدونتي غير معروفة !! لديك مدونة إذا لديك صوت ، ونحن نحتاج صوتك معنا

رايي الشخصي:

"مافي شي اقدر اكتبه ازيد على الكلام .. فعلا الشركات صارت مصاصه دماء .. اتعس خدمات نت مقدمه بالكويت مقارنة بباقي الدول .. و اغلى الاسعار .. وتحتاج ان احد يوقفها عند حدها .. وشكرا شكرا"

11.6.11

زحمه افكار + توديع البحرين

قاعده اشيل قشي لاني تخرجت من البحرين .. راح اوله عليها وايد .. بس لي ييات بعد ماخلصت .. وراي حوسة الشهاده هيههيهيهي .. مممم .. مادري .. وايد افكار بمخي مادري شسوي .. وماني عارفه انام .. حتى ماني عارفه ارد ولا اقعد جم يوم اتمتع .. مع ان شقتي شبه فاضيه صارت وسيارتي بعد شوي بدزها الكويت .. شكلي بقعد يوم او يومين

ادري ادري .. اني متقلبه المزاج ويمكن بعد شوي ارد عادي الوضع استقبلوا اي شي .. قراراتي مفاجاه كلهم حتى مرات استغرب من نفسي ليش ماستقر على راي معين :\

والله مادري شقاعده اخربط بس حبيت اكتب اللي قاعد يصير حاليا

حوسه .. كراتين بكل مكان بالشقه .. ماكو ديفيدي ورسيفر .. لما اتكلم اسمع صدى صوتي .. الكرفايه فوقها جناط مبطله حلجها و فيها اغراض لي النص .. اغراض القطاوه و اهم الاشياء الحمد لله دزيتها تقريبا كلها واللي بيبقى بحطه بالسياره و بدزه مع اللي بياخذ سيارتي

الخطوه اليايه اللي قاعده افكر فيها .. يا انها تكون خطوه جهنميه تكلفني بو سبع او تسع سنوات كفاح من حياتي .. طبعا ماراح اقول شنو الخطوه .. بس الغريب بالموضوع ان ميم صديقتي الصدوقه اللي ماعندي غيرها فكرت نفس هالتفكير ونفس الوقت .. لاني لما طرحت عليها الفكره بالبلاكبيري مسنجر انصدمت وقالتلي انها بنفس الوقت كانت تفكر بهالشي .. وتلوموني لي حبيتها بعد .. فديتها .. الاتصال الروحاني بيني وبينها قوي جدا يعني اذا ما ماكو نت ولا بلاك بيري ولا رصيد ممكن استخدم قانون الجذب معاها بسرعه يكون في رد لول (مداعبه بس ممكن اجربه لو انحطيت بهالموقف)

هم فكرت اني اسوي شي يديد يعبر عن مافي (خاتري) هيهيهيهيههي .. شي ماجربته من قبل بشكل جدي او مادرست اساسياته .. بس احبه وايد و استمتع فيه بكل وقت


جني كتبت وايد :\
بس بس كفايه جذي .. وشكرا شكرا

8.5.11

موقع مريح للبحث عن دورة معينه

وصلني هاللنك بالتويتر .. وحبيته الصراحه .. لاني كنت قبلها افكر ادش دوره رسم .. و ماني عارفه وين وشلون .. فكنت مقرره اني اسال بتويتر اذا احد يعرف .. فياني هالتويت من بوراشد .. جنه يقرا افكاري هيهيهيههي الله يعطيك العافيه

الموقع يشمل دورات متنوعه .. يتم البحث عنها حسب نوع الدوره المطلوبه .. سهل ومافيه تعقيدات و بسيط .. حبيته الصراحه .. الموقع اهو
http://www.dawrat.com

وشكرا شكرا

7.4.11

The Smurfs - trailer 2011

احلى باباي متطور شفته ايام الطفوله كانت نقله قويه الى عالم اخر .. يات له ايام و صار مشهور حيل والكل يحبه .. بس الحين اندثر نوعا ما .. وشكله بترد الهبه مالت السنافر مع نزول الفلم باغسطس 2011 .. نفس ماردت هلوو كيتي :$



link

5.4.11

تصوير نادر للشيخ جابر الف رحمه عليه

"تصوير نادر لزيارة الشيخ جابر الله يرحمه للملك فهد الله يرحمه بالبر
والملك يقول للشيخ: عسى مهوب سلمان اللي يسوق؟ والشيخ جابر يقول: لا ولا كان طاير فينا يازينها من بساطة وعدم تكلف..
خصوصاً يوم قال الملك بالأخير عسى الغدا خالص؟ حسيته عازم أعز أصدقاه لبيته ويمون عليه حيييل شووفوووه مقطع ناااد
التصوير مو واضح بس شوفوه للآخر

الله يرحمهم :'(

و الله يرحم ذيك الايام

من احلى ما شاهدت لهذا اليوم :'("



link
وصلني بالبرود كاست ودمعت عيني لما شفت بابا جابر الف رحمه عليه :(

13.3.11

ياحلاتهم والله


link

ماشاء الله قطاوته روعه .. حلاته الواحد يروح سوق الحمام يتمشى يشوف هالاشكال الطيبه الله رازقهم طبيعه وجو حلو .. و حيوانات اتينن تاخذ العقل .. ماشاء الله وشكرا شكرا

6.3.11

الله يرحمهم برحمته :(

راحت ايام الابداع و الشغلات الهادفه .. الله يرحمكم برحمته :(


وشكرا شكرا

24.2.11

احنا عشقناها


link

الاغاني الوطنيه القديمه لها ذكريات و نكهات خاصه عمرها ماراح تنعاد ابد

23.2.11

احلى زينه بفبراير 2011

وصلني هالنك اللي فيه احلى بيت محتفل في العيد الوطني 2011 .. ويقال ان هالبيت في غرب الجليب

بس والله حلوه زينته ماشاء الله

جان زين زينه الشوارع جذي بدال هالنيون اللي الكل يتمسخر عليهم :)


وشكرا شكرا

20.2.11

أنا من أكون؟

وسألت نفسي حائرًا .. أنا من أكون؟

مالي عشقت السير في طرق الظنون

فإذا جنوني صار بعض تعقلي وإذا بأفكاري يغلفها الجنون

أنا .. أنا .. أنا من أكون؟!

ما بال بعض الناس صاروا أبحرًا يخفون تحت الحب حقد الحاقدين

يتقابلون بأذرع مفتوحة والكره فيهم قد أطل من العيون

يا ليت بين يدي مرآة ترى ما في قلوب الناس من أمر دفين

أنا .. أنا .. أنا من أكون؟!

بيني وبين سعادتي بحر عميق

والناس حالوا بين قلبي والطريق

فلكم أعالجهم وبي سقم الضنا ولكم أنجيهم وكنت أنا الغريق

يا رب إن ضاقت قلوب الناس عن ما فيا من خير فعفوك لا يضيق

يا رب إن ضاقت قلوب الناس عن ما فيا من خير فعفوك لا يضيق

أنا .. أنا .. أنا من أكون؟



قصيده حوار مع النفس

للشاعر نزار قباني

غناء كاظم الساهر




link

15.2.11

الاعتصام بالبحرين


صج لي قالوا .. شر البليه مايضحك


نفيش!!


اعتصام هذا ولا معرض؟؟ شنو بالظبط :\