Celebrating a golden jubilee Kuwait style

الكويت تزين صحيفة الديلي ميل البريطانية

شي حلو ان الاجانب ينبهرون بالعرب .. بس مادري هل انبهرو ولا قصدهم شوفوا شكثر صوفوا عالجراغي هههههه .. المهم عجبتني الجراغيات وايد حلوه ماشاء الله .. الله يتمم علينا هالفرحه يارب .. اللي يبي ييشوف اكثر يدش عاللنك مال الخبر

Kuwait from top

وصلنا الكويت .. وهذي صوره لدولة الكويت الحبيبه من الاعلى .. وشكرا شكرا

 

كل عام وانتم بخير - عيد الفطر ٢٠١٢

الصوره مو تصميمي ترا .. بس وايد عجبتني

Kuwait airport - 17.8.2012

سفرتنا قصيره و سريعه .. بنعيد بقطر ان شاء الله انا و ورفيقه دربي مييم .. وايد مدحوا لنا قطر فقلنا نروح نشوفها

واحنا نتمشى بالمطار .. مرينا على المكان اليديد الخاص بالمطاعم .. راح اسميها الشايع سبوت لان ماعرف شسم المكان ههههه .. حبيت الشايع سبوت .. فتحوا فيه ستاربكس مع جم شغله يمه .. اهم شي عندي الصراحه ستاربكس حبيب البيييي

وشكرا شكرا

Thursday 2.8.2012

نفس التاريخ و اليوم يتكرر بعد مرور 22 سنه .. الله يرحمكم يا شهداءنا الابراء و يرحم بابا جابر وبابا سعد ويغفر لهم يارب

الكترونيات الغانم تبيع ايفون مستعمل

youtube link

وصلني هذا الفيديو بالبرودكاست اليوم .. فحطيته بتويتر و سالت الكترونيات الغانم عن مدى صحه هذا الكلام .. الصراحه ردهم ماكان مقنع .. حسيتهم يرقعون السالفه .. شوفو ردهم .. ولكم الحكم

وشكرا شكرا

With my friend MeeM @PizzaExpress

انتخابات مجلس الامه 2012

اليوم الصبح .. رحت مع امي ثانويه قرطبه علشان اصوت حق "الاصلح بنظري" .. بيني وبينكم كنت حاطه ابالي اني مابي اصوت .. بس فكرت فيها عدل وتعوذت من ابليس .. و ان شاء الله يكون اختيار فيه الخير و يكونون قد الثقه يارب .. نبي نشوف الكويت اللي تعودنا عليها من واحنا صغار.

الاختيار كان للمرشحين:
- علي العمير.
- فيصل اليحيى.
- محمد الدلال.
- هشام الشايع.

لما خلصنا واحنا بالسياره .. سالت امي .. من صوتيله؟ .. طلعت مختاره بالظبط نفس الاسامي هيهيهيهيههي يحليلها
وشكرا شكرا

Berry Boutique - fresh juice & frozen yogurt

اكتشفته عن طريق التويتر .. قالولي عندنا خوش فروزن تعالي جربيه .. هالكلام من زمان لما كنت بالبحرين وقتها كان افتتاح المحل اعتقد .. وكنت حاطته ابالي بجربه لي رجعت الكويت .. عاد بما انه قريب على مقر عملي .. قلت خل اجربه وانا طالعه يبرد علي .. وبدت رحله الادمان .. ياربي .. اتعب وانا اقول حلو وخفيف عالقلب .. مذاق لا يوصف .. خفيييف .. ومافيه لسعه الروب الحامضه .. يعني حق اللي مايحبها راح يستانس عليه .. من كثر ما حبيته .. قمت احس بان بنك بيري ثقيل على قلبي ويقثني .. تقريبا هجرته من اول ماذقت هالنكهه الخفيفه و اللذيذه

على فكره اهم مو بس فروزن يوقرت .. عندهم شغلات حلوه عصاير واشياء ثانيه .. و في شغلات حق اللي مسوين رجيم ومارجيم .. بس انا ادمنت عاليوقرت الخفيف واللطيف .. جربوه وعطوني رايكم .. اهو مكس .. بدون شي فوقه لان ماحب الفواكه وايد هيهيهيهيهيه

وانا قاعده اكتب اشتهيته .. مع اني مساع ماكله واحد

اللي حاب يجربه .. مكانهم بشارع البحرين .. يم بيتزا بابا جونز ..مو الشارع اللي فيه ستاربكس مجمع شيخه .. اللي جباله
وهذا رقمهم .. في توصيل للاماكن القريبه فقط .. 25730866
وهذا اكاونتهم بالتويتر .. @Berry_Boutique

وشكرا شكرا

Alpets.com .. موقع لعشاق الحيوانات

هالموقع كان اسمه سابقا

q8pets.net
طبعا كل محبي الحيوانات يعرفونه لانه غني عن التعريف .. و اللي ما مر عليه الموقع .. باختصار فكره الموقع كانت عباره عن عرض الحيوانات للبيع .. "وايد بعت فيه" .. بس حاليا تطورت الفكره وصارت اشمل .. شلون؟؟ .. الله يسلمكم صارت مكان اجتماعي لمحبي الحيوانات مثلي وشرواي احم احم .. الموقع صار يحتوي على عدة اقسام .. الا وهي؟

قسم خاص بعرض حيواناتكم الحبيبه بطريقه مرتبه وحلوه .. كل واحد من الحيوانات نقدر نكتب بياناته و نعرض صوره على حدى

وقسم خاص بالبيع .. لعرض الحيوانات اللي بتبيعونها فقط

وقسم خاص بالبحث عن حيوان معين او فصيلة معينه انتو تبونها

وقسم الحيوانات المفقوده (هالمكان يعور القلب الصراحه) ان شاء الله ما استخدمه

واخر قسم فيه المحلات اللي نقدر نشتري منها كل شي يخص الحيوانات مثل الاكل والالعاب و البيوت وغيرها من الاشياء المهمه للحيوانات

الموقع لي الحين تحت التجربه .. بس حبيته .. وايد حلوه فكرته وقويه .. عالاقل لو ابي اشتري شي اعرف صاحب الحلال شلون يعامل حيواناته .. مهتم فيهم ولا لأ .. وهم نشوف صور الام والابو و هالسوالف .. كل شي بالبروفايل يبين

كل الشكر حق صاحب الفكره و المنفذ وكل من شارك بهالمشروع الحلو .. يعطيكم الف عافيه

ملاحظه: كلمه حيوانات بقاموسي تشمل كل شي .. يعني طيور وحيوانات و زواحف و سمج (الانواع اللي نقدر نحطها بالموقع) .. وشكرا شكرا

alpets link
شرح استخدام الموقع link

2.8.2011

حملة المدونين ضد الانترنت المحدود في دولة الكويت

قررنا انا و الاخوه والأخوات المدونين الكويتيين القيام بحملة ضد الانترنت المحدود , وبما انه زمن الثورات قررنا القيام بثورة انترنتية ضد الانترنت المحدود تحت حجة “الاستخدام العادل ” فنحن المدونين نرفض رفضا تاما القيام بمثل هذه الممارسات اللتي تسلب من المشترك او المستخدم حرية استخدام للانترنت بالشكل المتعارف عليه في كل دول العالم , نحن ندفع في الكويت اسعار خيالية من اجل توفير خدمة انترنت ذات استخدام عادل بكل ماتحمله الكلمة من معنى , فالأستخدام العادل معناه ان يكون الانترنت غير محدود وغيرد مقيد بحجم ما , ولايجب ان افوت الفرصه للحديث عن ارتفاع اسعار الانترنت في دولة الكويت , فالاسعار هنا فعلا خيالية ومبالغ فيها , والمقابل خدمة محدوده جدا وغير عادلة للاسف نحن في زمن الانترنت وفي عام ٢٠١١ لايكاد يوجد شخص في الكويت الا ويستخدم الانترنت , وقد دخل الانترنت في جميع الاشياء سواء الهواتف النقالة والكمبيوترات وحتى الاتصالات اليومية والمراسلات بين الاشخاص , فمن هنا نعلن نحن المدونين الكويتيين عن رفضنا القطعي والتام لما يسمى بالانترنت المحدود

لذلك …

نطالب كل من يملك القرار بالتدخل بأسرع وقت ممكن لوقف هذي المهزلة ، وبناء على كلام النائب الفاضل أحمد السعدون الذي أقر بأن شركات الإنترنت ( غير مرخصة ) فنطلبه و بقية الشرفاء بالإسراع في وقف هذا العبث

هذا مجرد موضوع للتذكير !! وإن لم تتوقف الشركات عن سياساتها واسعارها المبالغ بها ، فسنقوم بكشف كل الأوراق ومن له حق القضاء سينصفه بدون شك

المدونات المشاركة في الحملة :

1- مدونة زهقان

2- Made in q8`s Blog

3- مدونة فيصل

4- صور وفيديو من الكويت

5- مدونة كيفان 5

6- مدونة منوعات

7- مدونة سو

8- بو جسوم

9- مدونة زقرتي

10- مدونة بو وضحى

11- مدونة هبات كويتية

12- مدونة غازي

13- q8y4ever

14- جبلة

15- مدونة بوفوزي

16- مدونة الجلاوي

17- q80mar

18- فرانكوم

19- Q8Ping

20- I’m Geek

21- مدونة أبوفلان

22- Kuwait Anti Bandwidth Cap Alliance<<< من أوائل المبادرين بارك الله فيهم

23- Q8LoL

24- Bluekads Blog

25- chocolate and chocolate

26- HiKuwait

27- TKANA

28- Blog Laish

29- الشبكة الوطنية الكويتية ( منتدى ) شكرا لكم تثبيت الموضوع

30- إلكتروني

31- Kuwait 10 World

32- Saleh’s Blog

33- pinkgirlq8

34- 18seven

35- q8simple

36- مدونة قحفية

37- sh5abe6

38- 3zezy

39- manoola82

40- مدونة شخصية فتاكة

41- WHY NOT

42- Alblogy

43- المباركية

44- أنت يا

45- HOW2Q8

46- mabee2

47- Q8 Lens

48- كويت بور

49- سوق ومزاد بيعة ( منتدى )

50- صور بلاك بيري

51- طلبة الكويت ( منتدى )

52- iMohmd

53- كويت i فون ( منتدى )

54- الكويت بيت الزين

55- ناعمة الهمس

56- Q8Ryuk

57- 4rockNrollers

58- إنعكاس الفكر

59- Q8 Rain

60- krazysweetONE

61- مدونة إستح

62- ALMOST BLOG

63- بودكاستي

64- meenakon

65- كاظمة ( صحيفة )

66- شخبوطة كويتية

67- Crowsy

68- NooN

69-

70-

71-

72-

73-

74-

75-

76-

77-

78-

79-

* الاخوة المدونين الراغبين بالاشتراك بالحملة , ماعليهم سوا نسخ الموضوع مع اضافة رأيهم الشخصي ووضعه كتدوينة في مدوناتهم و مراسلتنا

لا تقل مدونتي غير معروفة !! لديك مدونة إذا لديك صوت ، ونحن نحتاج صوتك معنا

رايي الشخصي:

"مافي شي اقدر اكتبه ازيد على الكلام .. فعلا الشركات صارت مصاصه دماء .. اتعس خدمات نت مقدمه بالكويت مقارنة بباقي الدول .. و اغلى الاسعار .. وتحتاج ان احد يوقفها عند حدها .. وشكرا شكرا"

تصوير نادر للشيخ جابر الف رحمه عليه

"تصوير نادر لزيارة الشيخ جابر الله يرحمه للملك فهد الله يرحمه بالبر
والملك يقول للشيخ: عسى مهوب سلمان اللي يسوق؟ والشيخ جابر يقول: لا ولا كان طاير فينا يازينها من بساطة وعدم تكلف..
خصوصاً يوم قال الملك بالأخير عسى الغدا خالص؟ حسيته عازم أعز أصدقاه لبيته ويمون عليه حيييل شووفوووه مقطع ناااد
التصوير مو واضح بس شوفوه للآخر

الله يرحمهم :'(

و الله يرحم ذيك الايام

من احلى ما شاهدت لهذا اليوم :'("

link
وصلني بالبرود كاست ودمعت عيني لما شفت بابا جابر الف رحمه عليه :(

احنا عشقناها

link
الاغاني الوطنيه القديمه لها ذكريات و نكهات خاصه عمرها ماراح تنعاد ابد

احلى زينه بفبراير 2011

وصلني هالنك اللي فيه احلى بيت محتفل في العيد الوطني 2011 .. ويقال ان هالبيت في غرب الجليب

بس والله حلوه زينته ماشاء الله

جان زين زينه الشوارع جذي بدال هالنيون اللي الكل يتمسخر عليهم :)

وشكرا شكرا

الارض كفيلها كويتي

راحة عجيبة انتابتني عندما كنت اتمشى بشوراع الكويت الفاضية ,,,,,لاحظو الفاضية :) وذلك في عطلة الاسراء والمعراج ... فايقنت تماما باننا بحاجة الى اعادة تفعيل عطلة يوم الجمعة لكل شيء ...وانا اعني بذلك كل شيء يعني لا مطاعم ولا اسواق ولا شي عدى المستشفيات والمطافي والصيدليات...والله اذا امكن حتى الشوارع الا للحالات الطارئة ..بمعنى اصح حظر تجول تام ولكن سلمي وجميل ولطيف ... رحمة بهذي الارض التي تعمل بالكويت على مدار العام 365 يوم وكل يوم 24 ساعة لمدة 7 ايام بالاسبوع....وكان الارض تحت كفالة كويتي ....يعني تشتغل طول اليوم والاسبوع والسنة والشهر غصب والا كنسلت اقامتج وسفرتج... طبعا هذا الحال مكرر في كثير من الدول العربية ....قبل خمس وعشرين سنة تقريبا كان عندنا يوم الجمعة هو العطلة الرسمية وفعلا المحلات تسكر وكل شي يعطل كما هو الحال في اوربا...البعض قد لا يوافقني الراي ولكنني اجد حاجة الارض بان ترتاح ليس دعوة من احد مؤيدي السلام الاخضر ولكن من اجلنا نحن البشر وبالاخص في الكوبت ....
لاننا لا نستقر في بيوتنا ...الجميع في الاسواق بالقهااوي وعفية شعب محتل القهاوي بهالطريقة ....الافنيوز القهاوي الكافيهات مفولة طول الاسبوع وليس الويكاند...شنو هذا ؟؟؟؟الظهر والعصر والمغرب وبالليل ....الشباب بقهاوي المنطقة الحرة من الظهر لي اخر الليل ؟؟؟؟ ؟؟؟ نحن بحاجة الى يوم واحد بالاسبوع حتى ترتاح عجلة الاقتصاد ...مع انها عجلة ولكن ايضا تحتاج للراحة ...نحن بحاجة الى ان ترتاح الشوراع ...والاصنصيرات ...المواقف...الاسواق ...السلالم المتحركة....اللمبات ...الشبات اللي بالشوراع....الحمامات (عزكم الله)...والاهم الاهم يوقفون الانترنت والموبايلات ...والله يسوون معروف بالبشر ... نحن بحاجة الى ان نريح هذه الاشياء حتى نستطيع ان نجلس كاسرة واحدة مع بعض مثل قبل لاننا فقدنا اللمسة البشرية في كل شيء واصبحت الحياة ماصخه وعبارة عن ارقام واشارات وايماءات بجفاف عاطفي وكما تقول نون دائما
وشكرا شكرا

:(

كهربتنا كهربت كهربتكم وكهربتكم كهربت كهربتنا

انا بكتب هالموضوع من القهر بس والا العادة طاف ... لكن الفساد وصل حده ... والاهمال صار يبجي ... ردة فعل هالمواطن بالصورة المرفقة بهالموضوع اهيا سبب كتابتي لهذه الرسالة ... وصل حال هذا المواطن ان يكتب احتجاجه على منزله بالدعاء الى الله عز وجل يشمل بدعاءه الحكومة والبرلمان ووزير الكهرباء خاصة ...يطلب انقطاع الكهربا عن بيوتهم " اللهم تقبل "

الفتره الحالية هي شهر ستة يونيو ونحن على مشارف شهر سبعه يوليو والياي اقشر وهو شهر اغسطس ثمانية الجهنمي ... ودرجات الحرارة وصلت الستين والناس امتحانات ... تدرون شنو امتحانات ؟؟ يعني البيت الكويتي مستنفر... مستقبل الابناء وحصاد ثمان عشر سنه من تعب الوالدين مركز في هذه الفترة ... تخيل تطفي الكهربا ... بالقطع المبرمج ... احنا الحين بعام 2010 للاشخاص الذين سيقرأون هذا الموضوع لاحقا ... طبعا هذا حالنا من عقب الغزو وقبله بسنوات ... مشكلة انقطاع الكهرباء كل سنة ونفس الحزة ... وكل عام تطلق وزارة الكهرباء حملة ترشيد ترصد لها الملايين ... طبعا الحملة مالها اي معنى وتبذير عالفاضي وضحك على البشر وسرقة اموال الدولة ... ليس لانها مو ضرورية فقط؟؟ ولكن لانها تدار بسذاجة شديدة حتى ان مجلةحائط صحفية بمدرسة افضل منها الف مرة على الاقل فيها صدق ... اما حملات الترشيد الحالية فهي حملة لا تليق الا برياض الاطفال " يا شطار لا تصرفون كهربا ترا ياكلكم الذيب اللي بالغابة " ما اقول الا " مالت " كما تقول شريكتي نون بهالبلوق العتيد ...

ولكن وين المشكلة ؟؟؟

انا اقولكم ... المشكلة مافي رجل قرار ... وزارة الكهرباء كسائر وزارات الدولة الاخرى ... فيها فساد وتخلف وجهل ومحسوبية وهذا عادي تعودنا عليه ... ونواب مجلس الامة ذكروا ما قلت في اكثر من مناسبة ... ولكن لم اسمع يوما ان نائبا احتج على بناء محطة كهربا جديدة ... ولا مدرسة جديدة ... ولا مستشفى جديد ...ولا على عقود مع اطباء ذو كفاءة ... ولا احتجو على شارع جديد ولا منطقة اسكانية جديدة ... طيب الخوف من المسائلة راح يا وزير ...

السؤال للوزير : تحت ايدك ملايين ان لم تكن مليارات ...مالذي يمنع من انشاء محطة جديدة ؟؟ خايف مرتبك "بتشوت بلنتي مثلا" قرار عادي بورقة وحده ينكتب ... لك صلاحيات مارسها ... واختر الاصلح من الشركات وباحسن المقايسات ... صدقني الشركات الاجنبية تطلب رضاك وباسرع من البرق ..." طوفها هالمرة" لا تنفع " ربعك " عشان هالطلاب المساكين ... والعياييز اللي بالبيوت مرضى وضعفاء ...

الله يهديكم بس ..... نصيحة لكل وزير ومسئول " يجب ان تضيف للكرسي ولا تدع الكرسي يضيف اليك " ومالت ( اكثر من هالميلان مافي )

وشكرا

مجلس الوزراء وافق على تغطية جميع طلبتنا الدارسين في الخارج بالتأمين الصحي

أعلنت وزارة الصحة امس ان مجلس الوزراء وافق على تغطية تكاليف التأمين الصحي لعلاج جميع الطلبة الكويتيين الدارسين في الخارج سواء على نفقتهم الخاصة أوعلى نفقة جهات حكومية في الجامعات المعترف بها.

وقال مدير ادارة المحاسبة المالية والتأمين الصحي في الوزارة محمد العازمي لـ «كونا» ان مجلس الوزراء وافق على زيادة الاعتماد المالي بمبلغ 5 ملايين دينار لبند علاج الطلبة الدارسين في الخارج بناء على دراسة أعدتها وزارة الصحة بالتنسيق مع وزارة التعليم العالي.

وذكر العازمي ان التنسيق جار بين المكاتب الصحية في الخارج والمكاتب الثقافية لجذب افضل عروض شركات التأمين المتخصصة، مشيدا بحرص القيادة السياسية في البلاد على توفير افضل أنواع الرعاية والخدمات الصحية لأبنائها الطلبة.

واضاف ان صاحب السمو الأمير الشيخ صباح الأحمد اصدر توجيهات سامية بتذليل جميع الصعوبات أمام الطلبة وتوفير التأمين الصحي الخاص بالطلبة الكويتيين الدارسين في الخارج.

source link