Cute Dog

كلب جميل .. كيوت .. بتمبه و شعره مغطي عينه هيهيههيه مايشوف حبيبي .. جميل

Lovely Huge Dog

هالجلب ذكرني في بل اللي مع سبستيان .. تذكرونه؟ اينن .. ماقدرت اقاوم .. رحت صورته عن قرب .. وشكرا شكرا

Cute Dog - Seattle

جلبه كيوت

Sent from NooN's iPhone.

Alpets.com .. موقع لعشاق الحيوانات

هالموقع كان اسمه سابقا

q8pets.net
طبعا كل محبي الحيوانات يعرفونه لانه غني عن التعريف .. و اللي ما مر عليه الموقع .. باختصار فكره الموقع كانت عباره عن عرض الحيوانات للبيع .. "وايد بعت فيه" .. بس حاليا تطورت الفكره وصارت اشمل .. شلون؟؟ .. الله يسلمكم صارت مكان اجتماعي لمحبي الحيوانات مثلي وشرواي احم احم .. الموقع صار يحتوي على عدة اقسام .. الا وهي؟

قسم خاص بعرض حيواناتكم الحبيبه بطريقه مرتبه وحلوه .. كل واحد من الحيوانات نقدر نكتب بياناته و نعرض صوره على حدى

وقسم خاص بالبيع .. لعرض الحيوانات اللي بتبيعونها فقط

وقسم خاص بالبحث عن حيوان معين او فصيلة معينه انتو تبونها

وقسم الحيوانات المفقوده (هالمكان يعور القلب الصراحه) ان شاء الله ما استخدمه

واخر قسم فيه المحلات اللي نقدر نشتري منها كل شي يخص الحيوانات مثل الاكل والالعاب و البيوت وغيرها من الاشياء المهمه للحيوانات

الموقع لي الحين تحت التجربه .. بس حبيته .. وايد حلوه فكرته وقويه .. عالاقل لو ابي اشتري شي اعرف صاحب الحلال شلون يعامل حيواناته .. مهتم فيهم ولا لأ .. وهم نشوف صور الام والابو و هالسوالف .. كل شي بالبروفايل يبين

كل الشكر حق صاحب الفكره و المنفذ وكل من شارك بهالمشروع الحلو .. يعطيكم الف عافيه

ملاحظه: كلمه حيوانات بقاموسي تشمل كل شي .. يعني طيور وحيوانات و زواحف و سمج (الانواع اللي نقدر نحطها بالموقع) .. وشكرا شكرا

alpets link
شرح استخدام الموقع link

ياحلاتهم والله

link
ماشاء الله قطاوته روعه .. حلاته الواحد يروح سوق الحمام يتمشى يشوف هالاشكال الطيبه الله رازقهم طبيعه وجو حلو .. و حيوانات اتينن تاخذ العقل .. ماشاء الله وشكرا شكرا

The Avatar is real

اعتقد ان نون ذكرت نصف الحقيقة عن هذي القطة العضاضة....من خلال نقاشي الدائم حول طبيعة كرمل المعيشية... نون تقول بان كرمل قطة نظيفة جدا تحافظ على مكانها مرتبا وانيقا....تطارد الحشرات في البيت وتحمي البيت من الضيوف الغير مرغوب فيهم .....كرمل لديها قدرة على اكتشاف الضيف الثقيل الظل فتقوم باتعابه من خلال عض حذاءه وملاحقة خيوط الحذاء ....من فوائدها انها تنفع خرامة ورق ....بالامكان مسح ارضيات السيراميك فيها ....لدي كرمل رياضة صباحية تطل بويه نون واهيا نايمة يعني تقوم بتمرير شنباتها على خشم نون عشان تقعدها من النوم....كرمل لا تعرف النوم ....فهي تنام اذا صاحبتها نامت وتستيقظ معها ....كرمل قطة حنونة ولكن لديها كبرياء لا احد يلمسها الا في الصباح عندما تكون بحاجة الى جرعات حنان....طبعا كل هالحجي كلام نون لما توله على كرمل بس الايام التي تكون فيها نون قريبة من كرمل ....تتفنن نون بتعذيب كرمل ...وكرمل تتفنن بتعضض وتشمخ وازعاج نون .....وشكلي بسوي كتاب "يوميات نون والخرامة كراميل " في نهاية المطاف كرمل قطة رائعه بس جسمها عود وصماخها صغير !!!! شلون لحد يسالني .....عند ي احساس انها مهجنه من راس نعامة وجسم نعية ... والله اعلم

caramel .. my avatar

Caramel
اهو اسم قطوتي الاخيره .. هالقطوه شريتها كبر كف ايدي وربيتها مثل بنتي .. كبرت عندي وحبيتها وايد .. بس عيبها انها مدلله عالاخر لي درجه انها تمردت وصارت عضاضه .. واحيانا احس انها جلب مو قطوه من كثر اللعب الدفش اللي تلعبه .. في يوم من الايام .. طقت براسي فكره .. اني اصبغها لون ازرق .. علشان تصير افاتار .. و كان وقتها توه نازل الفلم .. وصبغتها ازرق .. بس كانت معاناتي معاها انها تحت شعر ازرق :( .. و كل مكان شعر ازرق .. قبل كان اشقر ماحس فيه.

كبرت كراملو شويه .. و طلع شعرها و خفت الصبغه .. وصارت احلى وايد من قبل و هالمره صج افاتار صارت .. بس لازالت مشكلتي معاها واهي الشعر .. يحت بكل مكان .. لين قررت اني اقرعها.

ربطتها بحبل كونها جلبه مو قطوه .. مو راضيه تتاقلم انها قطوه حتى العابها العاب جلاب وشغلات تعضض .. الحمد لله والشكر .. المهم .. ربطتها و سحبتها علشان اقرعها .. و كانت ماشاء الله مطييييييييعه ماتعاند ولا تبرك بمكانها ماتتحرك من قال .. حدها تسمع الكلام وتيي عندي ما اسحبها كلش.

وصلت الـ Pets Farm .. و كنت طبعا مقرره اني بقص لها قصه الاسد من قبل .. و استلموها وبدو بحلاقتها .. مساكين .. طبعا الفلبينيه تعرف قطوتي مشهوره لانها بالعض .. و قارمه الفلبينيه من قبل لما كانت تصبغ لها اخرتمتها جم خرم .. بس هالمره نادت لها واحد يمسكها .. مساعد .. وعليه .. كان لابس دسوس وماسكها على باله قطوتي هينه .. مايدري انها قطوه فاقده الذاكره على باها جلب .. طبعا عفستهم و عضضتهم و شمختهم وكانت تفح و تنافخ .. والله كسرو خاطري الموظفين خنه حيلي .. وبهالوقت انا كنت افتر بالمكان واصور مع الجلاب و باجي الحيوانات .. اخيه بس اخيه.

خلصوا من القصه اليديده والنيو لوك .. و استلمت كرامل جلبتي .. قصدي قطوتي .. عفوا قصدي الاسد .. كراميل الاسد

وهذي نهايه قصه تحسونه كراميل .. صارت
اسد بس بيني وبينكم .. ماحسها اسد .. احسها جلب .. جيواوا

CaRaMeL