Lisboa - Restaurante Pic-Nic

Paelha del senorito

  

هذا الطبق التقليدي لدوله اسبانيا وهم يعتبر تقليدي في البرتغال كونهم جيران ونفس النظام .. اسم الطبق بالعربي بقيه .. يقول لكم في القديم كانت مكونات الطبق عباره عن بقايا الطعام .. اما بقايا طعام بحري .. او بقايا طعام بحري مع لحم  .. او مع دجاج .. اللي اهو .. الله يسلمكم كانوا ملوك الاندلس لي خلصو من الاكل يمعوا فضلاتهم و حطوها للفقاره المساكين ياكلون .. والفضلات اهي مثل ماقلت لكم بقايا الطعام فسموها بقيه على هالاساس .. هذي القصه قديمه وفي كذا قصه طلعت الصراحه مادري ايهي الاصح س هذي الاكثر انتشارا .. الهم نرجع حق محورنا اللي اهو هالاكله العجيبه .. الحين الله يسلمهم قاموا يسونها بشكل محترم بالمطاعم يعني مايمعون البقايا وهالسوالف مو علبالكم بقايا الزباين لول .. لا .. قاموا يطبخون هالطبق ويتفننون فيه .. مكونات الطبق اللي كليته كانت خثاق وربيان و سمك و محار و خضار .. و مادري اذا الاساس عيش او شي ثاني بس المهم ان الطبق عجبني ولذيذ احب المكس مال السي فود

وشكرا شكرا 

Lisbon - Weekend

A Brasileira Cafe

هذا الكافيه اهو اقدم كافيه في ليزبون واهو مجود من عام 1905 .. الكافيه عنده اسبريسو خطير و الحلويات جميله جدا .. الكافيه فتح له مطعم بنفس المبنى الدور الارضي  بس ماجربت المطعم مالهم .. حبيت الكيك ماله .. لذيذ و خفيف وايد .. الكيكه بالصوره الاولى ماذكر اسمها بس اهي ككاو .. احلى من اللي بالصوره الثانيه .. و اللي بالصوره الثانيه اهي جيس كيك بالليمون

وشكرا شكرا  

Spirit of Fatima

رحله اليوم كانت لمدينه فاطمه المقدسه .. اسم المدينه اسم عربي بحت .. و فاطمه اهو الاسم اللي اطلقوه على مريم العذراء في البرتغال .. لانها ظهرت في مدينه فاطمه .. وحسب كلامهم ان مريم العذراء لها عده اسامي بناء على المكان اللي طلعت فيه للناس .. هذا سبب تسميه مريم العذراء بفاطمه هناك

الحين نيي حق القصه المتداوله و شلون ظهرت فاطمه او مريم العذراء هناك .. القصه المتعارف عليها بالبرتغال تقول ان مريم العذراء شوهدت من قبل 3 اطفال رعاة غنم .. و امرتهم بتوصيل رساله معينه تحمل السلام و الحب و الصلاة .. فاخبروا اهل البلده بالرساله و اصبح المكان مقدس حيث يسافر اليها الناس من كل الدول للصلاة و طلب الغفران و التضرع الى الله بالاستنجاد بفاطمه اللي اهي مريم العذراء

 

هذي كنيسه فاطمه من الخارج و من الداخل

من الاشياء المقدسه اللي شفتها ان الناس يزحفون على ركبهم من اول المنطقه الى الكنيسه في طريق معين .. يطلبون الغفران و يناجون الله .. و حتى القسيس كان يتضرع الى الله

هذه المدينه مختلفه عن اي مدينه اخرى انها حقا مقدسه من سكانها .. حتى رائحه المدينه مختلفه و مميزه وهي عباره عن رائحه الشموع المحترقه و الفانيلا

المدينه فيها زروعات و اشجار كثيره .. و عجبني لون هذه الشجره .. غريب وجميل

 

على اليمين صور العذراء في الكنيسه فاطمه .. و على اليسار صوره الاطفال اللي شافوا مريم العذراء .. فرنسوا مارتو اللي ولد في 11/6/1908 و توفي في 4/4/1919 .. و ياسينت مارتو اللي انولدت في 11/3/1910 و توفيت في 20/2/1920 .. وانولدوا و عاشوا في مدينه فاطمه

وشكرا شكرا

صور منوعه للمنطقه صوب البحر في يوم غائم

سياره الزباله العجيبه

اول ماشفت سياره الزباله .. تحسرت على سياييرنا الصفره .. سياييرهم ذربه  و عليها رسمات حلوه وايد تشرح الصدر .. واهم شي بالموضوع ان مافيها ريحه لي مرت يمنا كلش .. مو احنا ياخلاف .. من تمر الواحد يسكر خشمه ويسكر الدرايش

وشكرا شكرا

Lisboa - Lisboa Noite Restaurant

كالعاده عشاي عباره عن سي فوووود .. طبقي مكون من قطعه صغيره من سمكه مادري شسمها بس شكلها عبيط و كبيره وايد وايد .. الصراحه كنت خايفه ان اييبون لي طبق زفر لان اغلب المطاعم يسووها عالبخار وماتعجبني هالطريقه فيها زفره ..فقلت حق المسؤول مادري صاحب المطعم .. و خذاني معاه صوب السمج ونادالي الشيف وراواني النوع اللي راح يسويه واقترح علي طريقه بالطبخ وعلى اساس ان لو ماعجبني الاكل اغير الطبق .. قلت له اذا جذي اوكي هيهيههيهيهي .. المهم .. الطبق عباره عن سمج و ربيان و محار و بطاط عنونين بصلصه جميله لطيفه ليمونيه و يمكن فيها زبده مادري .. المهم ان الاكل رووووعه وايد حبيته .. و حبيت طريقه الطبخ .. هم انصح انكم تروحون له اذا زرتوا البرتغال

وشكرا شكرا

Morning Pic - Lisbon

اول مره صورت هاللقطه لما كنت اتريق بسطح الفندق .. عجبتني اللقطه .. عاد ثاني يوم نطرت دريشه تتبطل علشان اصور نفس اللقطه هيهيهيههيهيي حبيت الحركه

وشكرا شكرا

Colombo mall

انا وميم رايحين نتسوق .. هذا اكبر مجمع عندهم حده زقرت .. فيه ٤٥٠ محل.

وشكرا شكرا

 

Sent from NooN's iPhone.

Smoggy day

Me and my friend MeeM having our Breakfast on the roof :D.
Lisboa 10:00AM

Cristo Rei

Cristo Rei -  17 May 1959

هو تمثال المسيح الموجود في لشبونه في البرتغال .. تمثال عملاق جدا و تم بناءه عام 1959 بعد تمثال المسيح الكبير و الموجود بالبرازيل .. هذا التمثال كنا نشوفه من بعيد يفصل بينا وبينه نهر .. بالليل شكله وايد حلو مع الليتات ومميز بالسما .. فحبينا نروح نشوفه عن قرب .. خذينا العباره وعبرنا الضفه الثانيه من النهر .. بس للاسف لما وصلناله طلع مسكر على تنقلنا بالباصات و وصلناله الا متاخرين .. فخذيت له جم لقطه من بره السور .. و تمشينا بالمنطقه نفسها .. كانت شوارع منطقه مرتفعه .. وحلوه و بيوتها ملونه و جميله بعضها قديم و بعضها تم تحديثه .. و يومها الجو كان حلو و يساعد عالمشي 

وشكرا شكرا 

Lisboa Starbusck - حبيب القلب

جبال الفندق .. بينا وبينه شارع .. وهذا احلى مافي الموضوع هيهيهيهيههي

على طاري الفندق .. الفندق اللي سكناه وايد ممتاز من ناحيه الخدمه و النظافه و الديكور والاهم الموقع .. اسم الفندق

Altis Avenida

وشكرا شكرا

Portugal - Alfama

هذي الله يسلمكم الـ الفاما اهو حي برتغالي وايد قديم لم يتم تجديده .. المباني كلها الوان و فوق بعض .. و نظامها مرتفع ونازل شوي متعبه بالمشي .. فيها كافيهات ومطاعم قديمه و اثريه و حياة السكان هناك وايد بسيطه جنها ايام قبل .. اقصد قبل التكنلوجيا الحديثه .. حتى تلفزيونات الناس القديمه الفر .. شي غريب .. بس في شي اغرب من كل هذا .. الصوره الاخيره .. واهي عباره عن باب مسوين له ابقريد هيهيهيهيهيهيهيهيهي

وشكرا شكرا